Monokultur (vun ooldgr. μόνος monos, alleen un lat. cultura, Anboo, Pleeg) weert de Gemarken in Land- un Wooldweertschop, un ok in'n Goornbo nömmt, wo over en Reeg vun Johre hen man bloß een Plantenaart anboot warrt.^[1]As landweertschoppliche Methode bringt de Monokultur Vordeele bi Pleeg un Aarnt un maakt de Arbeit eenfacher. Man faken weert natüürliche Ressourcen, as Licht un Water, un Synergie-Effekte twuschen allerhand Organismen nich optimal bruukt. Todem kann de Kultur gauer stöört un dör'nanner brocht weern (ringe Resilienz).

De Begreep warrt ok bruukt, wenn in de wecken Regionen de Bueree sik sunnerlich mit een Produkt befaten deit, as mit Kattuun, Koffie un Vehtucht. In en overdragen Sinn warrt vun Monokultur ok snackt, wenn in sunnerliche Regionen oder Städer in en Land de Industrie man to'n gröttern Deel sik mit man een Produkt befaten deit un vundeswegen vun Krise gau umsmeten weern kann, as bi Schippbo, Bargwarke, Kledaaschen- un Smuckindustrie etc.^[2], oder, ganz allgemeen, wenn enerwegens man een enkelt System den ganzen Markt regeern deit (as in de Software-Industrie, wo dat Windows-Bedrievssystem grote Deele vund en Markt bestimmen deit^[3]
) oder ok in de Kultur, wenn man sunnerliche Twiege vun de Kultur over de annern regeern doot oder wenn sunnerliche Ansichten over Kultur den Kulturmarkt to'n groten Deel bestimmen doot.

In'n Plantenbo heet Monokultur ok de Eenfeldweertschop, wenn de Fruchtfolg man bloß mit een Plantenaard pleegt warrt.^[4]

Belege |

1. 
   ↑ pflanzenforschung.de: Monokultur
   


2. 
   ↑ Gabler Verlag (Rutg.), Gabler Wirtschaftslexikon, wirtschaftslexikon.gabler.de: Monokultur
   


3. 
   ↑ golem.de: IT-Verband warnt vor Gefahren durch Windows. golem.de, afropen an'n 21. Juni 2010
   


4. 
   ↑ R. James Cook, pnas.org: Toward cropping systems that enhance productivity and sustainability. Proceedings of the National Academy of Sciences. Vol. 103, Nr. 49, S 18389-18394.